Hlub Tus Zoo Phooj Ywg

Hnub twg, hnub twg kuv tsis pom koj

Kuv tsis paub nyob, tsis paub ua neeg

Siab seev yuj yees rau txhua txoj kev

Saib lub ntiaj teb nyob nphob lis xuav

Kho siab khuj khuav rau koj ib leeg

Hnub twg, hnub twg kuv tsis ntsib koj

Kuv tsis tuaj zog yuav mus ua noj

Kuv nyob mluas mlob qaug zog luj luas

Kuv yeej tsis muaj lub ntsej muag luag

Kho siab ua luaj nco koj ib leeg

Yog hnub twg tsis hnov koj hais lus

Ces nyob ib hnub tsis txawj tsaus ntuj

Txawm tsis tau hlub, txawm tsis tau yuav

Los tsuav muaj koj los ua kuv luag

Tsuav yog muaj koj ua tus phooj ywg

Txawm li ntawd xwb los yeej zoo siab

Hnub twg, hnub twg yog tsis pom koj

Saib lub sij hawm mas tsis txawj tig

Ncaim koj ib ntsis ntev li ib xyoos

Tus phooj ywg zoo, tus phooj ywg hlub

Kuv twb nyiag hlub koj los lawm ntev