Kuv Npau Suav Mus Ntsib Koj

Tus ntawm no-------------yog nraug Hmoob vaj

Yuav los tshaj--------------------ib tsab xov tawm

Lub keej khawm---------------txoj uas kev hlub

Ntuj thaum ub---------------nyob nroog nab fias

Siab yuj lias------------------tuaj zos roob tsawb

Zoo ntxim tawb--------------cev yiag dawb mos

Niaj hmo yos--------------------tuaj nyob sib zov

Sib xa xov---------------------txog txoj kev plees

Hais seev yees--------------------tsis xav tso tseg

Mob tej teg-------------------ua plawv yuav nres

Yam tus ntses-----------------tau pas dej ntshiab

Zoo ntxim siab-------------lub neej thaum hluas

Teb chaws puas-----------kev hlub plam plhuav

Npaum ntuj nchuav----------ntiaj teb ntxeev tig

Av qhuav nkig----------------------dej sib tw lau

Sib ncaim tau---------------peb caug tawm xyoo

Koj lub moo----------------------twb ploj zuj zus

Wb tej lus--------------------------uas tau cog cia

Twb mob ntxhia----------------yuav rov qab zoo

Tseg tsis nroo---------------------ua siab tsis nco

Cas nag hmo--------------------ho rov npau suav

Pom koj tuav---------------------kuv ib sab npab

Zaum ib sab-------------------tham txog kev nco

Sim neej no------------------------nco kuv ua luaj

Pom koj quaj------------------kua muag ntws sis

Kuv khoov ntshis-------------muab kuv tes tsho

Coj los so----------------------koj cov kua muag

Kuv khawm puag -------------koj rau xub ntiag

Ib me pliag-----------------------koj kua muag tu

Hnov koj hu-------------------kuv lub npe hluas

Tias vaj nruas--------------------yog tiag los dag

Zaum no ntag------------------xav kom yog tiag

Kuv tig kiag---------------------los tuav koj plhu

Tsa ncauj hu------------------hais tias maiv nyiaj

Cev zeej txhiaj------------------tus zoo sim xeeb

Yeej yog tseeb-----------------tsis yog npau suav

Wb tham dhuav-----------------ces wb mus tsev

Taug tej kev------------------------nce toj qis hav

Ntoo siv lav-------------------tawg paj dawb vog

Noog poog pog-------------ntxais paj zom zaws

Paj zeeg tshaws---------------------rau ub rau no

Wb tig hlo---------------------saib rov pem roob

Pom hav xyoob-----------------hav ntoo kaj nrig

Hnov nraj yig----------------quaj suab xiv nqiab

Nyaj cuam liab---------------suav kau zom zaws

Me paj raws----------------tawg txhij tawg txhua

Hnov cuab npua----------------puag pem nej zos

Suab kab nqos-----------------quaj kho siab tshaj

Txiv pos daj----------------------siav kawg kiag li

Wb luag ntxhi----------------------mus de los noj

Kuv saib koj------------------------yeej zoo li qub

Tseem ntxim hlub----------------li ntuj yav dhau

Kuv tseem yau-----------nyuam qhuav tiav hluas

Wb tham txuas------------------tsis muaj tsawg lo

Ces wb ho----------------------mus tom moos cab

Hnov suab kab-------------quaj saum ntsis ntoo

Cua tuaj loo---------------------ua ntoo rawv tag

Wb tso dag------------------tham luag mob plab

Tau sib thab----------------------sib zeg taug kev

Pom txiv cev--------------------siav daj pes vog

Wb mus txog----------------tim sam muas txhos

Ntsuag xyoob pos------------sam leej zom zaws

Wb tshwm plaws----------ntawm dej cawm siav

De nplooj txhiav------------------los ce dej haus

Sib tham txaus-----------------mus txog khib xaj

Txaus siab tshaj-------------------ua ke tag hnub

Wb kev hlub----------------------rau neej tiam no

Kuv thiaj ho--------------------tuav rawv koj tes

Yam tus ntses------------------luam dej yuj yeev

Yeej tsis seev----------------------txog leej twg li

Tham lus ntxhi-------------------rau koj xwb tiag

Wb tij kiag-----------------------saib rov qub qab

Tuav koj npab-------------------rov los mus tsev

Pom koj ev-----------------------ib lub kawm rov

Kuv txawm hnov---------------koj hais lus taum

Nco txog thaum-----------------caij noj peb caug

Tham nrov yaug---------------pov pob zom zaws

Kev sib raws--------------------------rau ub rau no

Wb los so----------------------tim tsag kev ntxhab

Hnov suab kab-----------------quaj nrov zig ziag

Cua tuaj ntxiag------------------wb cev txias zias

Siab yuj lias--------------------tsis xav ncaim koj

Wb tig zoj-------------------saib pem qhov tsaug

Hmoob kev taug--------------ntuag toj ntuag pes

Wb sawv nres-----------------saib pem roob zoo

Pom hav ntoo---------------ntsuab xiab tsaus nti

Wb thiaj li---------------------ntsia pem xam kaj

Kho siab tshaj---------------tsis xav ncaim mus

Koj tej lus--------------------tham seev yuj yees

Txoj kev plees---------------yav puag thaum ub

Kev sib hlub---------------nyob zos roob tsawb

Neeg siab dawb----------------nrog koj ev nplej

Caij kwv dej-------------------tej chaw sib tawb

Hav paj dawb-----------------------fab ti kwj tse

Tim ncauj ke------------------kev ncaim nce toj

Kuv nrog koj------------------mus dob teb zaub

Pem teb taub--------------------daim teb av dub

Kev sib hlub-------------------nyob caij ntuj no

Lus sib nco-------------------kuj tham tag nrho

Wb rov hlo----------------------los txog dej liab

Kab noog diab------------quaj nrov ntsho nrooj

Hmoob tshuab nplooj--------nrov kho siab zim

Sab puag tim------------------lawv zos tiaj npeb

Nyob pem teb---------------lawv roob teb npleg

Tshuab tsis tseg-----------suab nplooj xiv nqiab

Nrov kho siab------------------suab seev sib dib

Teb kab tsib--------------------nrog koj mus lov

Caij sawv ntxov-----------------wb kuj sib cuag

Wb rov zuag---------------tham lus tseem tseeb

Lus meej xeeb--------------wb tham khee kawv

Kuv tuav rawv-----------------koj txhais me tes

Mus tsis nres-------------------tham kev sib nco

Sim neej no------------------------nco koj luaj li

Tham lus ntxhi------------------rau koj tsis tseg

Hnub tuaj ntseg---------------los txog ntug zos

Hmoob tuav cos -----------suab nrov doog diaj

Hnov suab tsiaj----------------sib tog zom zaws

Wb tshwm plaws------------ntawm nej tog tsev

Sib tham ntev-----------------tsis xav sib ncaim

Koj nyob nraim------------hauv kuv nruab siab

Cia xyoo tshiab---------------wb mam sib yuav

Kuv quaj zuav-------------------tsis xav rov qab

Koj siab fab---------------------tsis xav sib nrug

Siab kub lug-------------------txog kev sib tshua

Ob leeg ua -------------------kua muag ntws nto

Sim neej no----------------------sib nco luaj tiag

Quaj kawg kiag----------------vim sib nco dhau

Lawv thiaj tau--------------sawv phov txaj nrov

Kuv thiaj hnov----------------tsim dheev los no

Ua cas ho--------------------yog npau suab xwb

Kua muag twb-----------ntxaum hauv ncoo tag

Hais cuag dag---------------ntub tog hauv ncoo

Nws ntub loo-------------npaum xuas dej tsuag

Rov qi muag-----------------kom npau suav dua

Lawv sawv ua---------------tshais ntxov los noj

Dab ntub ploj---------------mas chim siab dhau

Zaum tsaws npau-----------kho siab tshaj plaws

Tim teb chaws----------------------ua tsov ua rog

Kuv thiaj nrog--------------cov laus khiav lawm

Koj kuv txawm--------ncaim thaum ntawd kiag

Qhov tseeb tiag------------------vim tsov rog loj

Kuv thiab koj--------------------wb cov lus tseeb

Thiaj khuam xeeb------------ua kua muag nrog

Nco los txog--------------------niaj hnub nim no

Thiaj tseem nco----------------------koj ua luaj li

Hnub thawm hli----------thiaj tshem tsis tawm

Kev txij nkawm-------------------li ncav tsis tau

Nws thiaj dhau--------------------ua kev sib nco

Koj thiaj ho--------------------poob rau tom qab

Nyob nrog kab-------------thiab nrog noog quaj

Kuv ncaim tuaj--------------------rau rooj teb no

Los tseem nco------------------wb tej chaw nyob

Lub siab mob---------------cuag kua txob ntsim

Ntshe yog vim---------------txoj hmoo tsis tiam

Teb chaws piam-----------nplog liab siab phem

Tuaj rhuav tshem------------peb Hmoob yaj sab

Txoj kev tab---------------------lub cuab lub yig

Nws thiaj tig--------------------mus rau lwm tus

Hmoob leej nus-----------------thiaj tsis tau koj

Lub plawv ntoj-----------------ces siav yuav yaj

Nco koj tshaj-------------------nyob rau tiam no

Xyov yuav nco--------------mus txog hnub twg

Me phooj ywg-------------------tus kuv hlub e!!

Es koj ne!! -------------------puas nco kuv thiab

Me nplooj siab---------------------tus cev tsis loj

Koj niam noj----------------------dab tsi yug koj

Zoo tam zoj----------------me ntxhais nkauj hli

Es thiaj ci--------------------mus thoob ntiaj teb

Ua rau peb-----------------------nco nej tag hnub

Thiaj muab qhub------------coj los nthuav tawm

Kev txij nkawm-----------------twb ncav tsis tau

Nws thiaj dhau----------------------mus zoo li no

Wb thiaj nco-----------------------mus tag ib sim

Yeeb yog vim----------------zuag tau ntawv nco

Nyob tiam no-----------------tsis tau ntawv hlub

Kuv thiaj rub--------------------tsis tau koj npab

Ua kuv nyab-----------------mus nrog kuv nyob

Siab thiaj mob----------------cuag dej kub npau

Nws thiaj dhau-----------------mus ua dab neeg

Muab tham deeg---------------nrog huab cua ya

Li thov xa-------------------------ib tsab xov tua

Nrog suab quaj---------------saib koj puas hnov

Neej nram ntxov---------nyob teb chaws nplog

Puas nco txog------------------wb txoj kev hlub

Yav thaum ub----------------nyob pem teb yeeb

Tej lus tseeb-------------------kuv tseem nco tas

Siab khis ras------------------cuag rwj aws ncus

Tham lo lus------------------yeej hais tsis tawm

Kev txij nkawm-----------------tsis tau nrog pib

Thov kom ntsib-----------------nyob rau tiam ob

Neej pov plob-------------------ho nphau rov los

Tej lus ntos-------------------------seev koj tas li

Zais tuag nthi---------------rau hauv nruab siab

Koj tus ntxhiab---------------kuv tseem cim cia

Ntsib mam qhia---------------rau koj lawm xwb

Hais txog wb---------------------txoj kev sib nco

Thov saub ho------------muab ntawv nyiaj keeb

Los nrog teeb---------------ua ntawv puaj txwm

Tuav keeb kwm---------------rov rau lwm tiam

Wb keeb kiam---------------mam ho ntsib ntxiv

Thiaj tsis chiv------------------kev mob siab dua

Xws nthwv cua--------nplawm ntuj ntws lawm

Kom hmoov sawm------------wb txhob sib cais

Yog yuav hais--------------yeej tham tsis txhua

Thiaj li ua--------------------npau suav pom koj

Siab ntsws ntoj---------------nco koj heev dhau

Thiaj li tau-----------------muab los tham tawm

Kom plawv nqawm---------siab ntsws ho nqig

Tej tsuj plig---------------------rov los puab cev

Siab ho ntev------------------ua neeg mus ntxiv

Yog yuav chiv------------------npau suav li qub

puas muaj hnub--------------rov tau lawm mog

Tseem xav txog---------------lub neej yav dhau

Wb tseem yau-----------nco npaum nkauj hnub

Ntsib dab ntub-----------tseem tham luag ntxhi

Txiv nraug hli---------------nco koj tshaj plaws

Yog tham ntxaws-----------ces kua muag poob

Me nkauj Hmoob------------tus me ntxim hlub

Nkauj dab ntub------------txiv nraug npau suav

Tham tsis dhuav-----------------ua ke tsis txaus

Hais tsis xaus---------------------tej lus sib hlub

Nkauj dab ntub----------thiab nraug npau suav

Nws puas tshuav-----------ib zaug lawm nawb

Hmoob roob tsawb-------------tus me neeg zoo

Yog puag loo-----------------mus yeeb yaj kiab

Thiaj zoo siab------------------os me leej muam

Tej lus xuam---------------thov koj txhob chim

Yeeb yog vim--------------txoj hmoov tsis txog

Tej lus cog------------------hais muaj hais khov

Thiaj tig rov----------------nyob lwj siab ntsuav

Yam noog puav------------------ua neej dai taw

Tsis muaj chaw------------------li no lawm tiag

Lub xub ntiag-------------------thiaj pw txias to

Seev tag hmo-------------------rau tej npoo txaj

Lub ntuj kaj--------------------los tsis xav sawv

Ntuj yuas lawv------------------tus me neeg zoo

Tsis muaj hmoo-----------------thiaj tsis tau koj

Yog tuag ploj-----------------thov kom sib ntsib

Nywj vag ib-----------------nyob rau nruab dab

Tuav koj npab---------------haus paj zaub quag

Rov tau puag----------------nyob kuv xub ntiag

Paj zaub qiag-----------------li kab npauj npaim

Ya nrog nraim---------------------ua ke ywj siab

Mus thawj thiab----------------xeeb rov los dua

Kom txhob tshua----------------koj li lawm tiag