Kuv Ua Koj Luag Mus Tom Teb

muaj ib hmos thaum wb sib ntsib

koj txawm pib nug ua dab tsi

teb luag ntxhi tias kuv nyob xwb

koj kuv wb txawm pib sim tham

nyob ib tsam sib puag ib hmos

kuv yuav los koj txawm pib taij

puas muaj caij wb mus ua si

kuv txawm ntxhi tias mus qhov twg

me dej lwg txias zias nruab siab

koj teb tias wb mus nram teb

ua puas deb kuv teb koj lus

koj tias mus thiaj li mam paub

kuv thiaj saub tias puas mus tau

koj txais nkaus tias ntshai dab tsi

mus ua si kom wb siab kaj

kuv thiaj npaj kaj ntug hnub tawm

koj tuaj lawm kuv mam lawv qab

dhau toj ntxhab ces koj zaum tos

kuv tuaj txog wb tham luag ntxhi

tias ua si qhov twg xwb ma?

koj tias cas pheej yuav xav paub

mus deb taub coj los pub npua

ua kuv luag xwb tseem ntshai thiab

hauv kuv siab luag nyav rau koj

tsis ntshai loj los yeej ntshai me

koj txawm de kuv caj npab doog

mus tig toog hav zoov nuj txeeg

wb ob leeg tsis nco ntshai dab

kev hav fab dej nag ntub ntsuav

kho siab khuav thaum tuav koj tes

mus txog ces wb tsis de taub

txawm sib qaub sib nwj sib hnia

thaum tso cia hnub yuav ploj roob

suab noog qhoob kab tsaus ntuj quaj

tsis tau luag nkaus hlo kawm ev

rov los tsev ob tug mluas mlob xwb tiag…